Республикэм икъэлэ шъхьаIэ футболымкIэ икIымэфэ зэIухыгъэ зэнэкъокъу мэзитIум къыкIоцI Мыекъуапэ, Тульскэм, Гавердовскэм ащыкIуагъ. Командэхэр купищэу гощыгъагъэх. ЗэIукIэгъухэм ешIэкIо 800 фэдиз ахэлэжьагъ.

— Апшъэрэ купым команди 10 щызэнэкъокъугъ, — къытиIуагъ зэIукIэгъухэм ясудья шъхьаIэу Пэнэшъу Мыхьамодэ. — Ростов хэкум, Москва,Ставрополь ыкIи Краснодар краим, Къэрэщэе-Щэрджэсым, Адыгеим, нэмыкIхэм якомандэхэм ахэтхэр Мыекъуапэ щызэдешIагъэх. Осыр къесэу, хъотыр зэрихьэу мэфабэ къыхэкIыгъэми, зэIукIэгъухэр игъом зэхащэщтыгъэх.

— ЕшIапIэхэр, зэнэкъокъум фэдгъэхьазырынхэм фэшI тракторхэр, фэшъхьаф техникэу тищыкIагъэр игъом дгъэфедэщтыгъэх, — зэдэгущыIэгъур лъегъэкIуатэ Мыекъуапэ иадминистрацие физкультурэмкIэ ыкIи спортымкIэ икомитет ипащэу Дмитрий Щербаневым. — ЦIыфхэм языгъэпсэфыгъо уахътэ гъэшIэгъонэу агъэкIоным фэшI яфэIо-фашIэхэр дэгъоу зэрэдгъэцэкIэщтхэм тыпылъыгъ.

Я 2 — 3-рэ купхэм ясудья шъхьаIэу Игорь Калиниченкэм къызэрэхигъэщыгъэу, кIэлэегъаджэхэр, полицием икъулыкъушIэхэр, юристхэр, Адыгэ Республикэм изаслуженнэ артистхэр, спортым иветеранхэр, фэшъхьафхэри ешIапIэхэм ащызэнэкъокъугъэх.

Алексей Филипповыр илъэсыбэрэ Мыекъопэ «Зэкъошныгъэм» щешIагъ. УхъумакIоу зэрэщытыгъэм къытегущыIэзэ, я 3-рэ купым зэIукIэгъухэр зэрэщыкIуагъэхэм иеплъыкIэхэр къариIолIагъэх.

— Аужырэ илъэсхэм республикэм испорт псэуалъэхэм япчъагъэ хэпшIыкIэу хэхъуагъ, футбол ешIэ зышIоигъохэм япсауныгъэ агъэпытэнымкIэ, языгъэпсэфыгъо уахътэ гъэшIэгъонэу агъэкIонымкIэ амалышIухэр яIэх, — къыIуагъ А. Филипповым.

Нахьыбэ зэхарэщ

Спортым пыщагъэхэм яшIоигъоныгъэхэм тигуапэу защыдгъэгъозагъ. КIымэфэ зэнэкъокъум ыуж нэмыкI зэIукIэгъухэм ахэлэжьэнхэу фаех. ГущыIэм пае, нахьыпэкIэ Журавлевым фэгъэхьыгъэ шIэжь зэIукIэгъухэр, фэшъхьаф зэнэкъокъухэр зэхащэщтыгъэх. Гъатхэм е бжыхьэм футбол зэнэкъокъухэр гум рихьэу кIощтыгъэх. Мыекъуапэ иадминистрацие физкультурэмкIэ ыкIи спортымкIэ икомитет Iофтхьэбзэ хэхыгъэхэм кIэщакIо афэхъун имурад. Арышъ, уахътэм къыгъэлъэгъощтым тежэщт.

«Ошъутенэр» атекIуагъ

«Ошъутенэм» итренерэу Мэзлэукъо Арсен зэрилъытэрэмкIэ, апэрэ чIыпIэм, анахь макIэмэ, команди 4 фэбэнагъ. «Ошъутенэм» текIоныгъэр къыдихыным фэшI ешIакIохэм гуетыныгъэ ин къызхагъэфагъ. «Урожаим» опыт ин зиIэ футболистэу хэтыр макIэп. Тренерэу Александр Матусьян «Урожаим» щыкIагъэу фэхъугъэр дэгъоу къыгурэIо. ЕшIэгъу пэпчъ футболистхэм дэгъоу зыфагъэхьазырын алъэкIыгъэп. Апэ ишъыгъэхэ «Ошъутенэм» 1:0-у, «Мыекъуапэм» 3:0-у, «Щагъдыим» 4:3-у «Урожаир» атекIуагъ, ау «ЧIыгушъхьэм», «Картонтарэм» къашIуихьын ылъэкIыгъэп.

— Кощхьэблэ районым тыкъикIызэ зэнэкъокъум тыхэлэжьагъ, — къытиIуагъ «Юность-Кощхьаблэм» итренерэу Юсуп Руслъан. — ЗыкIи тыкIэгъожьырэп. Я 8-рэ чIыпIэм нахь лъагэу тыдэкIоен тымылъэкIыгъэми, тикIэлэеджакIохэм сафэраз, яIэпэIэсэныгъэ хагъэхъуагъ, спортым ныбджэгъукIэхэр зэрэщагъотыгъэхэр сыдым ымыуас!

Юсуп Руслъан бэшIагъэу тинэIуас. Ар зипэщэ футбол командэхэр Къыблэ шъолъырым, Урысыем язэнэкъокъухэм ахэлажьэх, хагъэунэфыкIырэ чIыпIэхэр къыдахых.

«Кощхьаблэм» тигуапэу зы лъэныкъо къыхэтэгъэщы. Илъэс зэфэшъхьафхэм командэм хэтыгъэхэр нэмыкI купхэм ащешIэх, Мыекъуапэ щеджэх, яIэпэIэсэныгъэ хагъахъозэ, япсауныгъэ агъэпытэ.

АшIогъэшIэгъон

— Краснодар сыкъикIызэ ешIэгъухэм сяплъы, — къытиIуагъ педагогикэ шIэныгъэхэмкIэ докторэу, профессорэу Хьакъунэ Нурбый. — Футбол къодыеп тлъэгъурэр, псэ зыпыт зэIукIэгъухэм тызыIэпащэ.

Урысыем и Къэралыгъо Думэ идепутатэу Хьэсанэкъо Муратэ иеплъыкIэхэм къахигъэщырэр футболым лъэпкъ зэфэшъхьафхэр зэрэзэфищэхэрэм изакъоп. Самбэм, дзюдом, КъокIыпIэм къыщежьэгъэ бэнакIэхэм, атлетикэ онтэгъум, нэмыкI спорт лъэпкъхэм апыщагъэхэр кIымэфэ зэнэкъокъум хэлажьэх.

«Зэкъошныгъэм» щешIэ шIоигъу

Николай Бояринцевыр Къыблэ шъолъырым, фэшъхьафхэм ащызэлъашIэ, футболист дэгъу. Новороссийскэ, Ростов хэкум, нэмыкIхэм якомандэхэм ащешIагъ. Къэлапчъэм Iэгуаор дидзэнымкIэ сыдигъуи щысэшIу къегъэлъагъо.

«Мыекъуапэм» хэтэу гъогогъу 17 хъагъэм Iэгуаор мыгъэ изыдзэгъэ Н. Бояринцевым «Бомбардир анахь дэгъу» зыфиIорэ щытхъуцIэр фагъэшъошагъ, шIухьафтынхэр фашIыгъэх.

— Мыекъуапэ лъэшэу сыгу рехьы, стадион дахэхэр щагъэпсыгъэх, — къытиIуагъ упчIэхэм джэуапхэр къаритыжьызэ Николай Бояринцевым. — Мыекъопэ «Зэкъошныгъэр» къысэрэджи, сигуапэу сыщешIэщт.

Бояринцевым фэдэ футболист дэгъухэр «Зэкъошныгъэм» щешIэхэ зыхъукIэ, республикэм икомандэ ауж къинэхэрэм къахэкIыжьыщт, стадионым щыкIорэ зэIукIэгъухэм яплъыхэрэм хэпшIыкIэу ахэхъощт. Хьэсанэкъо Мурат, Мыекъуапэ иадминистрацие ипащэу Владимир Наролиныр, Мыекъуапэ инароднэ депутатхэм я Совет итхьаматэу Джармэкъо Азмэт, республикэм физкультурэмкIэ ыкIи спортымкIэ и Комитет итхьаматэу Дэгужъые Мурат хагъэунэфыкIырэ чIыпIэхэр къыдэзыхыгъэхэм афэгушIуагъэх, зэхэтхэу нэпэеплъ сурэтхэр атырахыгъэх.

Сурэтхэм арытхэр: «Ошъутенэр»; Николай Бояринцевыр.

Официальный сайт республиканской газеты «Адыгэ макъ» 18.01.2017 г.: http://www.adygvoice.ru/wp/зэнэкъокъум-зэфещэх/